خليل المتبولي: المحبين - تشويش رقم ( 7 )
Share 
Tweet 
Email 
بقلم: خليل إبراهيم المتبولي
في حل
ما في حل
مبلى ، في !
لأ ، ما في !
في إيجابية بالتعاطي
في سلبية بالتعاطي !
سلبية يللي تسلبَك سَلب ، خلصنا بقا
أنّو منسمع بمشاورات ، وبأفكار ، وبطروحات ، وبتقديم حلول ، وبعدين ؟
بعدين منوصل لنتيجة
كيف ؟ وشو هيي هالنتيجة ؟
نتيجة كبيرة وحلوة ، بتفرّح
لأ ولوووه ! شو هالحكي هيدا ؟!
إيه والله ، متل ما عم قلّك ، وما رح يصير إلّا متل ما هنّي بدهن
مين هنّي ؟
هنّي يللي بإيدُن الحل
إيه عال ، الله يبشرك بالخير ، يعني أنتَ متفائل ؟
لأ ، أبدًا ...
روح الله لا يوفقك ، على هالجواب
( ينظر إليه مشدوهًا ومتعجبًا ) !!!!!!
***
لمحبين كتار ؟
إيه كتير كتار ، خير شوفي هلأ ؟
ولا شي ، بس سؤال ، ليك هنّي محبّين ، بس متّفقين ؟
على شي ، وشي
شو يعني ؟ ما فهمت
مثلًا ، بتفق معك على إيجار البيت ، بس ما بتفق معك شو ممكن أعمل بالبيت
شو ممكن تعمل ؟
يللي بتملي عليي قناعاتي
وقناعاتي ؟!
شو خصني فيّا أنا
كل واحد مسؤول عن قناعاتو
بس البيت إلي
إيه وأنا مستأجرو
صح ، وأنت استأجرتوا على المحبة والإتفاق
على المحبة 100 % ، بس إتفاق مش كامل ، اتفقت معك على الإيجار بس
يعني نحنا شو هلأ ؟
نحنا محبّين ، بس مش متفقين بالكامل
ممممممممم ( باستغراب )
